Jurnal haqida

«Fan va kashfiyot» — ilmiy-nazariy va amaliy jurnal. Muassis — «CENTRAL SCIENCE PRESS» mas’uliyati cheklangan jamiyati. Jurnal o‘zbek, rus va ingliz tillarida chiqadi va Internet orqali tarqatiladi. Rasmiy veb-sayt: fanvakashfiyot.uz

Maqsad va yo‘nalishlar

Jurnalning asosiy maqsadi — iqtisodiyot, turizm, marketing, buxgalteriya hisobi, ekonometrika, menejment, ijtimoiy-gumanitar fanlar va lingvistika yo‘nalishlari bo‘yicha ilmiy tadqiqot natijalarini e’lon qilish.

Jurnalning vazifalari:

tadqiqotchilar, doktorantlar, mustaqil izlanuvchilar va amaliyotchi mutaxassislarning ilmiy maqolalarini chop etish;
ilmiy aloqalarni rivojlantirish va fanlararo muloqot maydonini yaratish;
tadqiqot natijalarini amaliyotga joriy etishga ko‘maklashish;
yosh tadqiqotchilarning ilmiy faoliyatini qo‘llab-quvvatlash;
xalqaro ilmiy hamjamiyat bilan hamkorlikni kengaytirish.

Jurnalda siyosiy targ‘ibot va reklama xarakteridagi materiallar, shuningdek ilmiy asosga ega bo‘lmagan matnlar chop etilmaydi.

Taqrizlash jarayoni

Qabul qilingan har bir maqola dastlab texnik ekspertizadan o‘tadi: rasmiylashtirish talablariga muvofiqligi va matnning o‘ziga xoslik darajasi tekshiriladi. O‘ziga xoslik darajasi 70 foizdan past bo‘lgan maqola taqrizga yuborilmaydi.

Texnik ekspertizadan o‘tgan maqola ikki tomonlama yashirin taqrizlashga (double-blind peer review) yuboriladi: taqrizchi muallif haqidagi, muallif esa taqrizchi haqidagi ma’lumotlarni bilmaydi. Har bir maqola kamida bitta, zarurat bo‘lganda ikki mustaqil taqrizchi tomonidan ko‘rib chiqiladi. Taqriz muddati — maqola qabul qilingan kundan boshlab 15 kundan oshmaydi.

Taqriz natijasiga ko‘ra quyidagi qarorlardan biri qabul qilinadi:

maqola o‘zgarishsiz chop etishga tavsiya etiladi;
maqola kamchiliklar bartaraf etilgandan keyin chop etishga tavsiya etiladi;
maqola qayta ishlangandan so‘ng takroran taqrizlashga yuboriladi;
maqola chop etishdan rad etiladi.

Rad etilgan maqola muallifiga asoslantirilgan xulosa yuboriladi. Taqrizlar tahririyatda uch yil davomida saqlanadi. Tahririyat kengashi a’zolarining maqolalari umumiy tartibda taqrizlanadi; bunda taqrizchi sifatida kengashning boshqa a’zosi jalb etilmaydi.

Chiqish tartibi va davriyligi

Jurnal yiliga 12 marta, har oyda bir marta chiqadi. Son oyning oxirgi haftasida e’lon qilinadi. Bir sonning hajmi 6 dan 10 gacha bosma taboqni (96–160 bet) tashkil etadi.

Chop etishga qabul qilingan maqola navbatdagi son shakllanishini kutmasdan veb-saytda alohida e’lon qilinishi mumkin (online first tartibi). Bunday maqola e’lon qilingan sanadan boshlab chop etilgan hisoblanadi, unga havola berish va ilmiy hisobotlarda foydalanish mumkin; keyinchalik u navbatdagi son tarkibiga kiritiladi.

Tahririyat alohida mavzu yoki ilmiy anjuman materiallari bo‘yicha maxsus sonlar chiqarishi mumkin. Maxsus son belgilangan davriylikdan tashqari chiqariladi.

Nashr etish etikasi

Tahririyat o‘z faoliyatida nashr etish etikasi bo‘yicha xalqaro tamoyillarga — COPE (Committee on Publication Ethics) qoidalariga tayanadi.

Plagiat, bir matnni takroran chop etish, ma’lumotlarni soxtalashtirish hamda haqqoniy bo‘lmagan hammualliflik chop etishdan rad etish uchun asos bo‘ladi.

Chop etilgan maqolada jiddiy xatolik aniqlanganda tahririyat navbatdagi sonda tuzatish e’lon qiladi, zarur hollarda maqolani chaqirib oladi (retraction) va bu haqda veb-saytda xabar beradi.

Taqrizchi va tahririyat xodimlari ko‘rib chiqilayotgan maqola mazmunini uchinchi shaxslarga oshkor qilmaydi hamda undan shaxsiy maqsadlarda foydalanmaydi. Manfaatlar to‘qnashuvi mavjud bo‘lgan holda taqrizchi maqolani ko‘rib chiqishdan o‘zini chetga oladi.

Tahririyat kengashi

Tahririyat kengashi jurnalning ilmiy saviyasini ta’minlaydigan maslahat organi hisoblanadi. Uning tarkibiga jurnal e’lon qilayotgan har bir yo‘nalish bo‘yicha kamida bitta fan doktori (DSc) yoki falsafa doktori (PhD) ilmiy darajasiga ega mutaxassis kiritiladi. Kengash tarkibiga xorijiy olimlarni jalb etish ko‘zda tutiladi. Kengash majlislari yiliga kamida ikki marta o‘tkaziladi.

Moliyalashtirish

Jurnal muassisning o‘z mablag‘lari hisobidan moliyalashtiriladi. Qonunchilikda taqiqlanmagan boshqa manbalar ham moliyalashtirish manbai bo‘lishi mumkin. Maqolani taqrizlash va chop etish bilan bog‘liq xarajatlar tartibi tahririyat tomonidan belgilanadi va jurnalning veb-saytida ochiq e’lon qilinadi.

Tahririyat manzili

Toshkent shahri, O‘rikzor MFY, Dilnavo ko‘chasi, 40-uy